NAADHOM PEPELING
Karya Abuya AsySyeikh Al Murobbi
KH MUHAMMAD MUHYIDDIN ABD. QODIR AL MANAFI, MA
Dengan lagam buhun Maskumambang
Pepeling ka dulur-dulur
He dulur-dulur Muslimin
Urang ulah loba ulin
Laku lampah geura salin
Kunu Mulya keur Muslimin
Zaman urang enggeus tomper
Mun geringmah enggeus komper
Sahoseun tereh ngagoler
Kade omat tong kaboler
Geura madep ka Pangeran
Tuturkeun Nabi Utusan
Tekad ucap lalampahan
Mangka meunang kabagjaan
Tapi mun hidep baleor
Ti Rosul kalah ngaleor
Api - api mata bolor
Pasti tikusruk jantowor
Gusti Alloh Anu Welas
Muga Ngampura Ngawelas
Ka urang anu meh tiwas
Ragrag ka jurang kareuwas
Kusaba dosa jeung dosa
Tekad ucap lampah rasa
Soleh ciga nu teu bisa
Cingcong kalah loba basa
Duh kumaha nasib diri
Siksa Kubur geus kaciri
Zabaniah balawiri
Nunggu nepika kiwari
He diri cik geura tobat
Ka Pangeran geura To'at
Ka Rosul rajin Solawat
Meh maneh meunang Syafa'at
Tong nurutan laku batur
Cekel Ajaran nu Luhur
Ti Nabi Nu Luhung Mashur
Meh hirup teu tigejebur
Geus loba nu niru kafir
Niup tarompet dipipir
Di jalan di gawir - gawir
Natalan ge milu hadir
Urangmah pan boga Rosul
Conto Mulya geura susul
Hirup omat tong mantangul
Pan isuk geto dipangul
Sing sieun ku Bendu Gusti
Siksa datangna teu harti
Duit pangkat pinter sakti
Euweuh nu bisa ngaganti
Geus paeh mah ukur euleuh
Nu dijagokeun teh euweuh
Nyeri siksa hanteu reureuh
Tambah poe kalah meuweuh
Geura tobat ujang nyai
Geura ngaji ka Kiayi
Da maot mo lila deui
Hidep bagja nu abadi
Geura agungkeun Muludan
Lahir Imam kaayaan
Lahir sugri Kabagjaan
Kamulyaan Kaunggulan
Tidunya dugi akherat
Salamet tina musibat
Mulya bagja hanteu elat
Keur nu iman tur nu to'at
Tah sakitu dulur dulur
Urang kota urang lembur
Pepeling nu ngan saukur
Keur pribadi eujeung batur
Muga muga jadi jimat
Salamet dunya akherat
Pek cekel ieu wasiat
Tinu hina anu ha'at
اللهم صل علي سيدنا محمد النبي الأمي وعلى آله وصحبه وسلم
Terima kasih sudah membaca postingan diatas, harapan besar untuk berkenan memberikan saran dan kritik melalui komentar yang baik dan tidak meletakkan link (aktif/mati). Terima kasih
EmoticonEmoticon